Attenzione: se non conoscete l’istro-veneto di Isola (caratteri speciali compresi) vi concedo di arrendervi subito.
CEŞETA
Piere cavade su piere spacade
dute imbroiade una su l’altra
le coverşi del tempo la sua coltra
come sta le vece copie spoşade.
Se rampiga el muro su pal monte
come un ragno che lavora col fil
giusto do volti fa de campanil
però anca quei xe meio de gnente.
De copi xe el teto dela ceşeta
ma el coto xe iutà dala piera
sorele da una granda masiera
che bora giassada ten sempre neta.
La me volta le spale quela ceşa
xe de ani che mi son in barufa
le manestre tropo longhe me stufa
e cussì anca quela fa l’ofeşa.
Mi so ben che fin là no posso rivar
no xe ponti e me manca le ale
go paura de scoltar le sigale
che solo volendo le riva siolar.
E cussì no resta altro che piera
ma drento de quela xe la fadiga
de chi ga lavorà come formiga
per far su un’idea che par vera.
507